هل”بروفايل” الموقع يهم محركات البحث؟ إنفنكس مول – بي تك – مونجيني

احصل على بروفايل خاص لموقعك مكتوب بشكل احترافي يعبر عنك وعن موقعك بطريقة مبدعة وقوية يكتبه فريق "بلانز" لكتابة المحتوى.

(من نحن، الرؤية والرسالة والهدف) الكلام ده بيكون موجود في صفحة إحنا بنقول عليها “بروفايل” الموقع، بالظبط زي الكارت اللي بتديه لواحد مكتوب فيه إنت بتشتغل إيه، أو بروشور مثلا بتوزعه وفيه ملخص عنك، الصفحة دي تقريبًا أهم صفحة المفترض تكون موجودة في أي سايت بعد الصفحة الرئيسية، بتتكلم عن موقعك وعن مجالك في سطور بسيطة، أولًا، من نحن، بتكتب إنت إيه في سطرين تلاته، لازم في “من نحن” تستخدم إسلوب الإيجاز والتحديد والدقة (يعني لا التطويل الممل ولا التقصير المُخل) وركز جدًا وإنت بتكتب لأن في السطرين دول إنت لازم توضح بالظبط للمستخدم أو العميل إنت عبارة عن إيه بالظبط (إنت مين وليه وإزاي :D).

في “الرؤية” بقى إنت بتوضح إيه رؤيتك المُستقبلية وتطلعاتك ونظرتك للمجال بتاعك، بالظبط زي م هتوضح كل أهدافك وأجندتك اللي بتشتغل عليها وعايز تحققها في “الهدف” ونفس الشغل هتعمله في “الرسالة” اللي هتوضح فيها الهدف الإجتماعي (اللي دايمًا بيكون غير ربحي) واللي هتلخصه في رسالتك اللي عايز تقدمها من شغلك ده أو المجال أو السايت بتاعك.

السؤال بقى، هل البروفايل مهم بالنسبة لمحركات البحث؟ الإجابة أكييييد وأكيييد وأكيييد، البروفايل في موقعك بالنسبة لمحركات البحث زي البطاقة وهيا معاك بالنسبة للشرطة كده، هل تنفع تمشي من غير بطاقة (أوقات بعملها :D) بس بكون خايف من كمين كده ولا كده (إعتبر تحديثات جوجل هيا الكمين ده)، لازم تهتم بصفحة البروفايل بنفس إهتمامك بأي صفحة تانيه، لانها فعلا مهمة وضرورية وحتمية لأي سايت عايز ينجح و يـ Rank في جوجل بسرعة.

جبتلكم 3 مواقع في مجالات مختلفة وهناخد جولة على “البروفايلات” بتاعتهم بحيث تكون زي دراسة حالة كده، نشوف أوجه القصور وأنهو موقع قدر يستفيد من الصفحة دي.

هل"بروفايل الموقع" مفيد فعلًا لمحركات البحث؟ ( بالتطبيق على مواقع "إنفنكس مول - بي تك - مونجيني )- دراسة حالة

موقع بي تك

هل"بروفايل الموقع" مفيد فعلًا لمحركات البحث؟ ( بالتطبيق على مواقع "إنفنكس مول - بي تك - مونجيني )- دراسة حالة

  • أول ملاحظة ممكن تاخد بالك منها من أول نظرة لبروفايل “بي تك” هو الخط الصغير (اللي لازق في بعضه) مش واضح أوي بالمقارنة بجميع محتوى الموقع، طب دا تقليًلا منهم بأهمية الصفحة دي (دا منطق هوا حد يعني بيقرا الكلام ده) أيوا في ناس بتقرا الكلام ده بل مبتدخلش على اي مكان في السايت اللي لما يقروا الصفحة دي.
  • النقطة التانيه خلو الصفحة من “الرؤية والرسالة والهدف” وإكتفوا بس بكتابة من نحن، ودا يعبتر تقصير كبير جدا لأن مش بس كفاية إنك تكتب عن جمال وعظمة وروعة الموقع والشركة بتاعتك (فين رؤيتك ؟ رسالتك ؟ أهدافك العامة إيه؟).
  • وبما إنه إكتفى بإنه يكتب عن الشركة بس من غير لا رؤية ولا رسالة ولا هدف فده خلاه يكتب كتييير ويسهب في الكتابة لأنه مش معقولة هيكتب كلمتين وخلاص في الصفحة، فكتب (402) كلمة في “عن الشركة” بس ودا يعتبر كتير، لأن مين هيقرا كل ده، لو لو كنت وزعتهم على (من نحن، الرؤية، الرسالة والهدف) كان هيكون سهل على القاريء أو العميل أو المستخدم.

(دا بروفايل إحنا كاتبيه لـ بي تك على موقعنا، تقدر تشوفه وتقارن بيه وبين البروفايل اللي عاملينه بي تك نفسهم): بروفايل شركة بي تك

موقع إنفنكس مول

هل"بروفايل الموقع" مفيد فعلًا لمحركات البحث؟ ( بالتطبيق على مواقع "إنفنكس مول - بي تك - مونجيني )- دراسة حالة

 

  • نفس المشكلة واقع فيها سايت “إنفنكس مول ” وهيا إنه تغافل تمامًا “الرؤية والرسالة والهدف” وكإنهم مسمعوش عنها قبل كده للأسف، رغم إن أي واحد دخل مدرسة أو أي مؤسسة في الدنيا هيلاقي الكلام ده مكتوب ومتعلق (صحيح محدش بيقراها في المؤسسات دي) لكن في العالم الإليكتروني مختلف، مهم جدا إنك تهتم بصفحات زي دي ومهم جدا إنك تعبر عن نفسك كويس وكويس أوي كمان.
  • لكن في موقع “إنفنكس مول” قدر يوجز “عن الشركة” بشكل ملخص وحلو وبدون إسهاب وكلام كتير (75 كلمة)، ودا المطلوب، تصميم الصفحة حلو ولو كان إهتم ببقية العناصر من رؤية ورسالة وغيرها كان هتفرق جدا.

موقع شركة مونجيني

 

هل"بروفايل الموقع" مفيد فعلًا لمحركات البحث؟ ( بالتطبيق على مواقع "إنفنكس مول - بي تك - مونجيني )- دراسة حالة

  • موقع مونجيني قدر يهتم شوية بصفحة “البروفايل” لكن دا ميمنعش إنه وقع في نفس الغلط اللي معظم المواقع العربية بتقع فيه وهوا بيكتب عن الشركة أو الموقع بس وبينسى الرسالة والهدف والرؤية، لكن يحسب ليه إهتمامه بخط الكتابة اللي كان واضح ومقري ومفهوم.
  • (415 كلمة) كان عدد كلمات “عن الموقع” بس لمونجيني ودا كتير بصراحه وإن كان جمال ديزاين الصفحة ووضوح الخط يغفروله الخطأ ده، كمان شكل الخط حلو.
  • لكن الخطأ اللي لا يغتفر إنه يرمي لينك كده وسط الكلام وكأنه القائم عى الموقع ميسمعش عن حاجه إسمها “هايبر لينك” فكاتبلنا جملة بالشكل ده:

يمكنك مشاركة من تحب في مصر كل المناسبات وترسل لديهم أفضل الهدايا من مكانك أينما كنت من خلال ويبسايت مونجيني  وجه رمى الرابط كده www.monginisbakery.com ، طب م كان ممكن يعمل كده (من خلال ويبسايت مونجيني) بس نقول إيه؟.

  • الخطأ البشع كمان هوا الأخطاء الإملائية في الجملة واللي غامضة ومش مفهومة ومش واضحة، إيه “يمكنك مشاركة من تحب في مصر كل المناسبات وترسل لديهم أفضل الهدايا” دي، طب قارنها بالجملة دي وانت تحكم.

“يمكنك مشاركة كل المناسبات مع من تحب في مصر وترسل لهم أفضل الهدايا من مكانك أينما كنت من خلال ويبسايت مونجيني

  • لما جه يستخدم “الهايبر لينك” بقى البرنس العظيم، عمله بس بـ Broken Link لما كتب اضغط هنا لمشاهدة البروفايل الخاص بمونجيني. بعد م تضغط مش هوديك غير في داهية 😀

 

هل"بروفايل الموقع" مفيد فعلًا لمحركات البحث؟ ( بالتطبيق على مواقع "إنفنكس مول - بي تك - مونجيني )- دراسة حالة

 

 

بعد الـ 3 نماذج دول أنصحك تهتم بصفحة “البروفايل” أو من نحن زي م كتير بيسموها، لأنها حقيقي مهمة سواء بالنسبة للمستخدم العادي أو حتى بالنسبة لمحركات البحث.